Saturday, May 10, 2014

புளிமிளகாய்

புளிமிளகாய்  எப்படி செய்வது என்று பார்ப்போமா?






தேவையானவை :

  1. புளி    ஒரு பெரிய எலுமிச்சை அளவு 
  2. பச்சை மிளகாய்  ஒரு கைப்பிடியளவு. ( நான் சுமார் நூறு கிராம் எடுத்துள்ளேன்.
  3. உப்பு  தேவைக்கேற்ப
  4. வெல்லம் சிறிது.
  5. எண்ணெய் ஒரு  ஸ்பூன் 
முதலில் வாணலியை  அடுப்பில் வைத்து  ஒரு ஸ்பூன் எண்ணெயை அதில் விடவும். நன்கு சுத்தம் செய்த பச்சை மிளகாய்களை  அதில் அப்படியே போட்டு வதக்கவும். நறுக்காமல் போடுவதால்  சிலது  வெடிக்கும்.  கொஞ்சம்  கவனம் தேவை . படத்தில் காட்டியது போல் வதங்கிய பின்  அடுப்பிலிருந்து இறக்கி  ஆற   வைக்கவும்.

பின்பு, மிக்சியில் புளி , வதக்கின பச்சை மிளகாய், உப்பு  எல்லாவற்றையும் போட்டு  அரைக்கவும். தண்ணீர் சேர்க்கவே வேண்டாம். நன்கு அரைபடும். நன்கு அரைபட்டதும் , இந்தக் கலவையில் வெல்லத்தைப் போட்டு ஒரு சில வினாடிகள் மிக்சியை சுத்தவும். பின்பு ருசிப்  பார்க்கவும். உப்பு, வெல்லம் , புளி  இதில் எது வேண்டுமானாலும்  உங்கள் விருப்பத்திற்கேற்ப
இன்னும் சிறிது அதிகமாக இருக்கலாம் என்று தோன்றினால்  மிக்சியில் போட்டு அரைத்து வைத்துக் கொள்ளலாம். கன்னாடி பாட்டிலக்ளில் வைத்துக் கொள்ளுங்கள் . தண்ணீர் சேர்க்காததானால்  மாதக் கணக்கில் கெட்டுப் போகாது புளி மிளகாய் .

                                     




 தயிர் சாதத்திற்கு மட்டுமல்லாமல், அரிசி உப்புமாவிற்கும்  துணை போகும். தொட்டுக் கொண்டு சாப்பிட்டு பாருங்கள் . அருமையான சுவையோடு இருக்கும்.உங்கள் எண்ணங்களை என்னோடு பகிர்ந்து கொள்ளுங்கள்.


8 comments:

  1. பயங்கர காரமாக இருக்காதுங்களா...

    ReplyDelete
    Replies
    1. அதற்குத் தான் வெல்லம் போடுகிறோமே! வேண்டுமானால் வெல்லத்தை அதிகமாக்கிக் கொள்ளுங்கள். அப்புறம் சாப்பிட்டுப் பாருங்களேன்.
      " உள்ளம் கொள்ளை போகுதே " என்று சொல்வீர்கள்.

      நன்றி எழில் உடனடியாக படித்து கருத்திட்டதற்கு.

      Delete
  2. இதை மிளகாய்த் தொக்குனு சொல்லுவோம். மிக்சியிலே அரைச்சுட்டு மறுபடியும் கடுகு, உ.பருப்பு , பெருங்காயம் தாளித்து வதக்குவோம். அப்போ வெல்லம் சேர்ப்போம். இம்முறையில் குறைந்தது 3 மாதங்கள் இதைக் குளிர்சாதனப் பெட்டி இல்லாமலேயே வைச்சுக்கலாம். காரமெல்லாம் புளி வைக்கிறதில் அமுங்கிப் போகும்.

    ReplyDelete
  3. இப்போ எங்க வீட்டில் யாருக்கும் ஒத்துக்காததால் ஜாஸ்தி பண்ணுவதில்லை. தக்காளித் தொக்கு பண்ணிடுவேன். அதையும் சாதம் கலக்கலாம்.

    ReplyDelete
    Replies
    1. நான் போன வாரம் தான் செய்தேன் . அதை அப்படியே பதிவிட்டு விட்டேன். இது எனக்கு மிகவும் பிடிக்கும் . நான் கடுகு தாளிப்பதில்லை. பாரம்பர்ய உணவுவகைகளை இபொழுதெல்லாம் யார் செய்கிறார்கள்? நேரமும் இல்லை அதையும் சொல்ல வேண்டுமே!

      உங்கள் வருகைக்கும் உங்கள் கருத்துப் பரிமாற்றத்திற்கும் நன்றி மேடம்.

      Delete
  4. பச்சை மிளகாய் தொக்கு ! பார்க்கும்போதே எச்சில் ஊறுகிறது. காரம் விரும்புபவர்கள் யாராவது உடன் சாப்பிடுவதாக இருந்தால் செய்யலாம். விடுமுறைக்கு மகள் வந்தால் செய்து பார்க்கிறேன்.

    ReplyDelete
    Replies
    1. செய்து , சாப்பிட்டுப் பார்த்து உங்கள் எண்ணங்களை பகிர்ந்து கொள்ளுங்கள் சித்ரா.

      Delete
  5. புளிமாங்காய் ஊறுகாய் எனக்கு மிகவும் பிடித்த ஒன்று. சுள்ளுன்னு உரைப்பாக இருக்கும். மோர் / தயிர் சாதத்துக்கு மிகவும் ஏற்றது. பகிர்வுக்கும் பக்குவத்திற்கும் நன்றிகள்.

    ReplyDelete

உங்கள் கருத்தை இங்கே பதியுங்கள்